2. Jeppaferð -Svínaskarð-

[hobo]

Nú er komið að annarri ferð jeppaspjallsins. Ákveðið hefur verið að þræða slóða upp á Svínaskarð, taka vonandi jafn gott útsýnisstopp og síðast, og halda svo heim á leið.
Þetta er róleg og krefjandi leið.

Lagt verður af stað frá Esjumelum miðvikudaginn 6. júlí, kl 19:00, mæting ca. 18:40

VHF er skilyrði, notuð verður rás 45

Æskileg dekkjastærð er 32"+, óbreyttir jeppar mega koma með

Til öryggis er hámarksfjöldi 10 bílar með fararstjórum, þeir fyrstu sem haka í "JÁ" komast með.

Meðfylgandi viðhengi geyma myndræna leiðarlýsingu, útbúnaðarlista og ferðareglur.

Allir þeir sem eru á póstlista ættu að fá e-mail á morgun, laugardag, þar sem þeir geta hakað við já, nei eða kannski, hvort þeir ætli í ferð.

Sjáumst hress!

[Freyr]

Sæl öll

Vil byrja á að minna á að þessi leið er ógreiðfær og getur verið stórhættuleg ef menn fara óvarlega.

Á bara að fara efst í skarðið að sunnanverðu og snúa svo við? Ég fór þarna um daginn í kvöldbíltúr. Keyrði áleiðis niður í Kjós en stoppaði svo og labbaði niður í gilið. Rétt áður en ekið er niður í botninn á gilinu hefur smáveigis drulla runnið yfir veginn svo hann hallar leiðinlega mikið til hliðar niður í gilið. Næst þegar ég fer tek ég með góða skóflu og gef mér tíma til að lagfæra þetta haft (eru bara 3-4 metrar ef ég man rétt). Fyrst þið eruð að fara þetta á annað borð væri skemmtilegra að klára leiðina.

Best að taka fram aftur að leiðin er hættuleg og reynir svolítið á bílstjóra..........................

Kv. Freyr

P.s. Fór þetta á óbreyttum Terrano

[peturin]

Andskoti er ég ánægður með þetta framtak......er úti á sjó kem örugglega með þegar svo hittir á
KV PI

[Ofsi]

Svínaskarð hópferð
Mín persónulega skoðun á því að fara Svínaskarð með hóp af misjafnlega vönu jeppafólki. Er sú að mér finnst nákvæmleg ekkert vit í því. Það er allt annað að fara þessa leið á fáum bílum í vina hóp þar sem allir þekkja alla.
Þær aðstæður geta skapast í hópferða þar sem 10-15 jeppar eru að fara þessa leið, að enginn vill vera sá sem gugnar á því að aka hliðarhallan á klöppinni. Þá getur verið að einhver reyni að klára þetta þó hann sé ekki fær um það. Því hann hefur allra augu á sér og getur ekki hætt við eftir að niður fyrstu brekkurnar er komið. Enda bölvað bras að snúa við og koma bíl aftur upp lausar brekkurnar. Þeir sem eru hið minnsta lofthræddir, eiga nákvæmlega ekkert erindi niður skarðið að norðanverðu. því má líka bæta við að eftir því sem jeppinn er stærri og hærri, breiðari og á stærri dekkjum, þá verður klöppin vara verri. Læt hérna fylgja með sögu sem ég stal úr bókinni Á fjöllum, en sagan segir frá tveim álfum sem fóru Svínaskarð að vetrarlagi þegar slóðin var ísilögð.
PÍNULÍTIL FERÐASAGA.
Í janúar 2002 nánar tiltekið á föstudags eftirmiðdegi, sátum við Jón Ebbi og spjölluðum um slóða, og dettur þá út úr mér hvort hann hafi farið Súkkuslóðann ?. Nei sagði Jón Ebbi, það hefði hann ekki gert og hann sem átti Súkku!!!!!!!
Var því ákveðið að fara strax daginn eftir og rannsaka slóðann. Fórum við á fætur klukkan 8.00 og drifum okkur af stað. Lögðum við af stað á tveim jeppum, enda tveir, og alltaf sama nýtingin á farkostunum.
Ekið var inn að Svínaskarði en það er vestan við Skálafell og þar var Runnerinn minn skilinn eftir í 400 metra hæð. Þar fór ég yfir í Súkkuna til Jóns Ebba því við töldum að leiðin væri ekki fær öðrum en allra minnstu jeppum. Lögðum við svo af stað út í það óþekkta vopnaðir tveim skóflum og járnkallinum góða frá Langavatni.
Töluverður ís var á veginum og varð gilið við veginn dýpra og dýpra eftir sem ofar dró en vegurinn hlykkjast þarna á brúninni ofan við hengiflugið. Höfðum við verið að hlusta á VH-effið á alvöru jeppakarlana á Langjökli og fleiri á öfundsverðum stöðum en við vorum bara hérna steinkast frá borginni og ekkert að gerast. En við héldum áfram upp brattann og jókst ísingin á slóðanum. Komum við þar að þar sem slóðin var þakinn stórum svell bunka sem endaði í brattri brekku og þar háttaði þannig til að ísinn þakti slóðina og ekkert af ytri vegkantinum stóð uppúr heldur slútti ísinn fram af veginum og niður í gilið. Jón Ebbi Rallý karl lét bara vaða út á ísinn. Ég var sallí rólegur þar til Súkkan fór að hægja á sér, en tók ég þá ósjálfrátt af mér beltið. Byrjaði síðan jeppinn að spóla og síðan að renna afturábak og jók hratt ferðina, Ákvað ég því í skyndi að yfirgefa þetta sökkvandi skip, opnaði ég því hurðina og henti mér út. Vorum við það nærri gilbrúnin að ég varð að láta mig vaða undir hurðina til þess að lenda ekki í gilinu. Flaug ég síðan niður eftir slóðinni á ísnum og er hreint ótrúlegt hvað maður getur náð miklum hraða, og varð ég sérstaklega var við það þegar ég þeyttist inn í grjóturðina fyrir neðan. Af Jóni Ebba og Súkkunni er það að segja að þau svifu saman niður eftir ísnum en héngu þó á slóðinni, þar til þau komu þar að þar sem börð voru beggja vegna vegarins. Þar splittaðist Súkkan föst milli barðana eftir að hafa kastast hátt í loft upp við áreksturinn við annað barðið. Tókst strax að losa jeppann og var síðan ekið ofan við ísinn og gekk ferðin vel upp í há skarðið. Þar var ákveðið að kíkja aðeins á löppina á mér, en hún var að verða svolítið sver af bólgu ( leggurinn reyndar tvöfaldur ) og tærnar blá-svartar. Reyndar var löppin öll marin og blá frá tám upp að rasskinn og vorum við félagarnir svolítið hissa á því að hún væri ekki brotinn miðað hvernig hún leit út. En nú var haldið áfram þar sem löppin virtist ekki ætla að tefja fyrir. Fór nú að halla undan á ný að norðanverðu og lá slóðin þar á gil brún og var þar afar þröng, meira að segja fyrir Súkku, og þurftum við því að hlaða grjóti undir hjólið gil megin til þess að sleppa yfir úrrennslin, og var innra hjólið á ís að ofanverðu en neðra hjólið á nýhlaðinni hleðslunni. Svona til öryggis ef ekki hefði tekist nægilega vel til við hleðsluna, þá hafði Jón Ebbi opna hurðina hjá sér á meðan laumast var yfir versta kaflann.
Eftir málar ferðalagsins voru þeir að ég fékk að hvíla mig í sófanum heima í rúma viku en, Jón Ebbi hélt því þó alltaf fram að hann hafi verið með allt undir kontról þar sem hann skautaði aftur á bak niður brekkuna.
Jón Ofsi Snæland

[birgthor]

Ég verð að vera alveg sammála fyrri ræðumönnum, það er ekkert vit að fara þarna nema max 4-5 bílar saman. Gilið getur verið stór varasamt sem og hliðarhalli á 2 stöðum. Slóðinn niður í Kjósina eftir gilið er svo mjög torfær og því ekkert vit að senda óbreytta bíla þarna. Það leiðir bara til þess að þeir grafi niður slóðann og skilji eftir sig ljót för.
Það er ekkert grín að gera mistök á nokkrum stöðum þarna og væru það msitök sem leiddu til alvarlegra slysa.

[hobo]

Eins og textinn og myndin sýnir, þá á bara að aka upp á topp skarðsins og snúa svo við. Ekki á að fara niður að norðanverðu, það væri bara óðs manns æði.
Ég hef farið það á fjórhjóli og hefði ég ekki vilja vera á stærra farartæki.

Reyndar eru 15 bílar nokkuð mikið, spurning hvort það ætti að hafa þá færri..
Persónulega vildi ég bara hafa 2-5 bíla en maður vill líka hleypa flestum þeim sem vilja með.

[SHM]

Sælir.
Ég fór þessa leið fyrst sumarið 1975 þegar við fórum tveir félagar á Bronco jeppunum okkar. Síðan hef ég farið þetta tvisvar, síðast sumarið 2005 eða 30 árum eftir fyrstu ferðina. Þá var ég á 4Runner og félagi minn á 38" Patrol. Hér eru nokkrar myndir úr báðum ferðunum og eins og sést er talsverður hliðarhalli og úrrennsli á smá kafla þegar keyrt er niður í gilið norðan megin. Eflaust hefur þetta svo versnað með árunum.
Sá sem á græna Broncoinn er Magnús Benediktsson (B.M. Vallá) en ég hafði auðvitað ekki rænu á að mynda minn Bronco þarna. Sá sem á svarta Patrolinn heitir Ingólfur J. Hauksson.
Kv. Sigurbjörn.

[nobrks]

Við þetta má kanski bæta að það er ekki plássinu að dreifa þarna, til að snúa við fyrir marga bíla.
Góða ferð.

[hobo]

Miðað við fjölda skráðra það sem af er degi, fer maður að hallast að breyta þessu yfir í lámarksfjölda bíla en ekki hámarks..

[SHM]

Ég er alveg til í að kíkja á þessa leið einu sinni enn jafnvel þó að ekki verði farið alla leið niður í Kjós. Ég hafði samt hugsað mér að gefa þeim, sem aldrei hafa farið leiðina tækifæri til að fylla þau pláss, sem eru í boði.
Samkvæmt því sem segir hér: http://www.f4x4.is/index.php?p=162198&j ... 28#p162198 ætlaði Magnús H. Norðdahl að fara rannsóknarferð um Svínaskarð í dag og koma heim aftur með fjölda mynda. Það verður spennandi að skoða þær.

Kv. Sigurbjörn.

[Fin]

hef nokkuð oft rennt yfir Svínaskarð. Versti kaflinn er drullan þegar komið er niður í Kjós. Brekkan niður í gilið norðanmegin er varasöm og hef svo sem þurft að laga veginn til að komast þetta. Bara taka með skóflu og járnkarl. Ekki reyna að fara þetta á minni dekkum en 32". Er annars mjög falleg leið og útsýnið þegar upp er komið fallegt.
Renni þetta á morgun og læt ykkur vita hverning færið er.

[hobo]

Ég vil minna á að ferðinni er ekki heitið yfir í Kjós, bara upp á hæsta punkt í skarðinu.

[Ofsi]

Var að koma úr Svínaskarði áðan. Þegar farið er upp að sunnanverðu. Þá þarf að klifra yfir tvö björg í slóðinni. Til þess þarf háfætta jeppa um 35 tommu. Þar fataðist Magnúsi aðeins aksturstæknin og fór hann út af veginum og hékk með innri hjólin rétt við vegkantinn og fórum við þarna uppeftir til þess spila hann upp á vegin Maggi verður örugglega með myndir á f4x4, enda tók hann fjölmargar þegar við vorum að ná jeppanum upp :-)

[Brjótur]

Ég hélt af þessum rosa umræðum að þetta væri eitthvað annað Svínaskarð en ég hef farið um, svakalegar skýringar og hliðarhalli, ef þetta er svona rosaleg leið þá býð ég nú ekki í ykkur upp til fjalla í alvöru ferðum, þetta hefur verið farið á Econoline t.d. ekki fara nú í stóru fýluna strákar en mér finnst þetta svoldið ýkt hjá ykkur :)

[frikki]

hehehehehehehe brjóturinn alltaf góður. En helgi það er ekkert hægt að miða við vitleysinga eins og okkur :)
kv
F.H

[Freyr]

Var að koma úr Svínaskarði áðan. Þegar farið er upp að sunnanverðu. Þá þarf að klifra yfir tvö björg í slóðinni. Til þess þarf háfætta jeppa um 35 tommu. Þar fataðist Magnúsi aðeins aksturstæknin og fór hann út af veginum og hékk með innri hjólin rétt við vegkantinn og fórum við þarna uppeftir til þess spila hann upp á vegin Maggi verður örugglega með myndir á f4x4, enda tók hann fjölmargar þegar við vorum að ná jeppanum upp :-)

Fór þarna upp á óbreyttum Terrano fyrir stuttu síðan, man nú bara eftir einu stóru grjóti á leiðinni upp að sunnanverðu, fór fyrir ofan það á leiðinni upp og neðan við það á bakaleiðinni.

[birgthor]

Ég er nú ekki að reyna ýkja þetta neitt, það sem ég sá hinsvegar fyrir mér var að þetta ætti að vera skemmtiferð. Ekki fannst mér skynsamlegt að leggja af stað þarna uppeftir fleirri en 4-5 saman.

Þessi leið krefst reynslu og býður ekki uppá mikil mistök á ákveðnum stöðum, ég veit ekki hvað þú taldir mig vera ýkja Brjótur.

Einnig væri ég alveg til í að sjá 44" Econoline þræða brattann niður í skarðið, því í sumarið 2010 eða 2009 horfði ég á 44" Patrol fara þarna niður og hann þurfti að láta afturdekkinn hamast í kanntinum til þess að ýta afturendanum í beyjurnar.

Ég sjálfur hef reyndar bara farið þarna að gili nokkru sinnum sitthvoru megin frá en einungis alla leiðina á fjórhjóli.

Svo er alltaf gaman af mönnum sem stæra sig af reynslu og kunnáttu svo haldu því endilega áfram :)

[Ofsi]

http://www.facebook.com/#!/profile.php?id=631644299
Hérna er vídeó af þessum steinum. Það er greinilega ekki hægt að fara upp fyrir þá. Allir jeppar sem geta talist jeppar labba auðvita bara yfir þá í rólegheitunum.

[hobo]

Sælt verið fólkið.
Við Kristinn erum búnir að kanna aðstæður og erum á því að viðmiðunar-dekkjastærðin sem við settum upp sé í takt við aðstæður.
Pökkuðum við nokkrum steinum við umtöluðu "björgin" sem eru í miðjum slóðanum og er því nokkuð gott að fara með hægri hjólin yfir efra bjargið, þegar ekið er uppeftir.
Dekkjastærðin er eiginlega ekki aðalmálið lengur, heldur það að bílarnir séu ekki mjög lágir og þá sérstaklega fyrir framan framhjól og aftan afturhjól. Þetta er misjafnt eftir tegundum.
T.d þegar við vorum á niðurleið og Kristinn fór yfir efra bjargið á 38" Pajero,var örstutt á milli grjótsins og afturbrettakantsins þegar hann keyrði niður af því. En það var langt í minn kant.

Ætlað að breyta hámarksfjölda í 10 bíla, en það ætti ekki að koma að sök þar sem fáir virðast ætla að leggja í þennan túr. Aðeins 4 bílar með okkur tveimur.

Við vorum rétt rúma 2 tíma að rúlla þetta fram og til baka, með smá stoppum, og vorum ekki að drífa okkur.

[birgthor]

Almennilegur undirbúningur, myndi reyna kíkja með ykkur ef ég væri ekki svona rosalega upptekinn þarna.

En hvernig er að komast uppúr fyrsta gilinu þar sem Skarðsá rennur?

[hobo]

Ertu þá að tala þarna við göngubrúna? Það bara gekk vel, fór þetta bara hægt með mjúkt í dekkjum.

[birgthor]

Já akkurat, það getur verið leiðindar aðkoma þarna. Var á 44" bíl þarna í vetur og var í smá vandræðum með kantinn, reyndar var vel af snjó þá.

[Fetzer]

ég þorði ekki þarna á glæ nyju polaris fjórhjóli um helgina þetta var svo kræft! vegbreiddinn er enginn!!

[Fetzer]

óttalegt drullusvað

[bragi]

Það er aldrei að vita nema að maður renni þarna með eða á eftir ykkur í rólegheitunum. Fór þarna upp á 35 tommunni að haugti 2006 og svo síðast vorið 2010 en þá fór ég einbíla hálfaleiðina í snjó, ís og krapableytu/drullu.

[-Hjalti-]

þetta er easy...

[Stebbi]

Er eitthvað búið að laga slóðan til? Ég fór þarna um sumarið 2007 á litlu fjórhjóli og skildi eiginlega ekkert í því hvernig menn hafa komið 44" patrol í gegnum beygjuna neðst í gilinu. Þá var rétt svo pláss til að höndla súkku þar í gegn.

[Jónas]

Unimog 404 að klára Svínaskarðið


http://www.pbase.com/jonash/image/24499574

[Fetzer]

ég segi það sama og stebbi.. eg skil ekki hverning maður treður 44" breyttum bíl i gegn.. varla að óbreytt súkka farai þarna uppá breyddina

[hobo]

Þeir sem ætla með og eru ekki búnir að skrá sig mega endilega drífa sig að því.
Einnig mega þeir sem ekki fengu skráningarpóst og vilja koma með, láta vita hér.
Bara svo maður viti hver heildarfjöldinn er.

Núna eru 4 skráðir með mér, óvíst er hvort Kristinn komi með, Pæjan eitthvað að stríða honum.

Veðurspáin er einkar glæsileg þannig að þetta verður bara gaman.

Svo bara til að útiloka allan misskilning, þá er ferðinni ekki heitið þangað sem margir hér tala um, þ.e.a.s í gilið norðanmegin. En mönnum er velkomið að fara þar niður á eigin vegum.

[kjartanbj]

Vild eg gæti komist með, en vinnan stoppar mig af næstu dagana

[Pajero1]

Hvaða rugl er þetta????
Yfir 50 eru búnir að skrá sig á póstlista og svo ákveða aðeins
5 að mæta í mjög skemtilega ferð rétt út fyrir Reykjavík..
Hvað er AÐ ykkur jeppamenn!
Ég mæti þó ég sé ekki.skráður.

[jeepson]

Erum við jeppa menn ekki bara að breytast í sófajeppa kalla? Nei ég segi svona :)

[Oskar K]

Hvernig gekk svo þetta ævintýri hjá ykkur strákum ?

[-Hjalti-]

Hér eru nokkrar myndir. Leiðinleg þoka, samt skemmtilegt brölt.

[kjartanbj]

sé að það er ekkert ljósmyndaveður, eins og ég heyrði einhvern segja á rás 45 áðan , hvort það hafi verið einhver ykkar veit ég ekki, var staddur í keflavík...

[SHM]

Þetta var ágætis ferð þrátt fyrir smá þoku.
Ég þakka fyrir mig.

Kv. Sigurbjörn.

[hobo]

Ég vil þakka ferðafélögum fyrir góða ferð.
Það fór ekki mikið fyrir útsýnisstoppinu á toppnum en menn tóku bara nærmyndir í staðinn.

[Stebbi]

Reyndu menn ekkert við brekkuna norðanmegin?

[SHM]

Reyndu menn ekkert við brekkuna norðanmegin?

Nei, en mig hálfklæjar í lófana að fara þangað aftur og skoða aðstæður til þess að sjá hvort mikil breyting hefur orðið síðan ég fór þarna niður árið 2005.

Kv. Sigurbjörn.