Brotinn endi í Pitman Armi

[grimur]

Ég lenti í því í liðinni viku að stýrisendinn í Pitman arminum á Gallopernum brotnaði.
Um leið og ég reif þetta úr var ljóst að um þreytubrot sem fer af stað vegna pyttatæringar var að ræða, sjá mynd:


Það er ekkert spennandi að fá varaluti í þessa bíla, Hekla sver þá af sér og segist ekkert geta gert. BL er litlu betra, segjast geta pantað í þá eftir einhverjum bókum.
22.000 kall síðast þegar þetta var til(þetta er sko stýrisendi innbyggður í pitman arm).

En það er kannski aukaatriði þannig lagað. Ástæðan fyrir því að ég er að pósta þessu er sú að þetta er klárlega ekki eina eintakið af Galloper sem hefur farið/á eftir að fara svona. Ég var svo heppinn að vera að taka U-beygju á heppilegum stað, einn í bílnum og "kjöraðstæður" fyrir svona óhapp.
Myndi ekki vilja hugsa það til enda ef þetta hefði farið í sundur með alla familíuna um borð úti á þjóðvegi.

Þegar ég fór að nefna þetta hér og þar kom í ljós að Pajero var innkallaður útaf nákvæmlega sama galla (1990 til 1999 módel).
Ekki neitt sem ég finn á netinu bendir til að Galloper hafi verið innkallaður útaf þessu, en það er greinilega ástæða til. Notaður varahlutur sem ég fékk í vöku úr óbreyttum bíl keyrðum ca 190.000km er með sömu einkenni:


Alveg sama mynstur er sjáanlegt á leggnum:


OK. Hvað er til ráða?

1: Pressa á BL að innkalla Galloper útaf þessu(ólíklegt til árangurs, en reyna má samt).
2: Láta alla Galloper eigendur vita af þessu
3: Útvega slatta af svona örmum á þokkalegu verði svo menn geti og tími að skipta.

Það er mikilvægt að hafa í huga að það er nánast ógerningur að greina þetta fyrir brot (almennt) og útilokað að þetta finnist í skoðun.
Skoðunarstöðvar ættu samt að vita af þessu og láta eigendur þessara bíla vita af veikleikanum.

Svonalagað er ekkert grín og Toyota hefur t.d. innkallað 16 ára gamlan bíl sem ég átti út af millibilsstöng.

kv
Grímur

[birgiring]

Er þetta kannske svarið??
http://www.ebay.com/itm/MITSUBISHI-GALL ... b3&vxp=mtr

[Fetzer]

viewtopic.php?f=31&t=21344

[grimur]

Ég er að fá nýjan frá Bretlandi já, mágkonan í verslunarferð næstu helgi og kippir þessu með.

En það er ekki aðal málið, aðal málið er að það eru tugir eða hundruð svona slysagildra á götunni og engan grunar neitt!!
Mig langar persónulega ekkert að fá einn slíkan framan á mig burtséð frá öllu öðru.

Það væri algert ábyrgðarleysi fyrir menn sem hafa þekkingu á svona brotum að láta ekki vita af þessu.

kv
G

[ellisnorra]

Já þetta þarf að ganga milli manna. Spurning um að heyra í FÍB og athuga með möguleikana á að láta þá sjá um málið, sem er síðan hægt að sjá hvort beri árangur með að skoða í póstkassann þinn Grímur.
Ég einmitt átti 92 hilux sem var innkallaður út af þreyttri millibilsstöng, en 91 bíllinn minn sem var nákvæmlega eins útbúinn var ekki innkallaður. Um svipað leyti, sennilega þó aðeins fyrr, brotnaði millibilsstöngin í 91 bílnum uppá Arnarvatnsheiði (á lítilli ferð) með tilheyrandi vandræðum og viðgerðum. Skrýtið að 91 bíllinn var ekki innkallaður :)

Flott hjá þér að láta vita af þessu, þetta er alvarlegt mál!

[Járni]

Sektorsarmarnir voru innkallaðir í L200 líka. Hann brotnaði svo hjá bróður mínum en fyrri eigandi hafði hundsað það að láta gera við bílinn.

Passar þetta ekki úr MMC?

[StefánDal]

Þetta þarf alveg klárlega að fara lengra en bara á spjallborð á netinu. Því miður hefur FÍB ekki staðið sig sem skildi í svona málum, miðað við dæmi sem ég hef heyrt. Ég myndi skoða aðrar leiðir. Neytendastofa eða Lögfræðiaðstoð Orator jafnvel?
Eitthvað þarf að gera.

Takk fyrir að láta vita! Ég mun láta þetta berast til þeirra sem ég þekki og aka um á svona bílum.

[Sævar Örn]

það eru mjög margir bílar með þennan sama pitman arm ennþá í umferðinni í dag

[hobo]

Mér og öðrum til glöggvunar, hvað kallast pitman armur og hvað sektors armar?

Edit:

Maður gleymir stundum að maður lifir á tímum Google..
En um að gera að fá útskýringar á móðurmálinu.

[Járni]

Hobo: Fyrir mér þetta sami hluturinn. Armurinn sem festist við ásinn úr stýrisvélinni.

[baldur]

Það eru nú líka nokkur dæmi um að sector öxullinn hafi brotnað í toyotunum. Man eftir 4runner sem fór útaf og velti þegar stýrið datt úr sambandi í þjóðvegakeyrslu. Svo þegar pabbi var að breyta stýrismaskínunni í 80 cruiser til að tengja við hana tjakk þá kom í ljós sprunga í sector öxlinum.

[grimur]

Það er rétt, sector öxullinn getur farið líka. Hef séð þannig brot. Það er bara ekki næstum eins algengt og þetta. Þetta gerist líka í alveg óbreyttum bílum, sem er algerlega óásættanlegt.

Kv
G

[íbbi]

vegna atriða sem var komið inn á í þræðinum,

gallopper eru vissulega framleiddur af huyndai samsteypuni, en ekki þeirri deild sem huyndai bílarnir sem við þekkjum eru framleiddir, og þ.a.l held ég að BL beri enga ábyrgð á þessum bílum,

hekla flutti þessa bíla inn, og ef þeir sverja þá af sér er það einfaldlega skítaþjónusta,

ég efast um að það þýði að þrýsta á umboðið varðandi innköllun, ábyrgðartími bílsins er löngu liðinn,

en úff, ljótt mál samt, ég fékk ákveðið verkstæði í hfj til að henda millibilsstöng í fyrir mig í leiðini þegar ég var með bíl í hjólastillingu og þeir hertu kastalarærnar á með lofti og snoðuðu rærnar og endana, ég brunaði grunlaus með bílakerru norður á akureyri og þegar ég var kominn datt stýrið einfaldlega úr sambandi, þar mátti þakka fyrir að það fór ekki illa

[Hr.Cummins]

Það varð banaslys á Sandgerðisvegi sem að rekja mátti til þessa galla fyrir mörgum árum (þetta var í kringum áramótin 1999-2000) og var talið að pitman armur (spindill sem að tilheyrði stýrisvél) í svona Galloper gaf sig og hann valt með þeim afleiðingum að eldri maður (Einvarður Rúnar) við stýrið lét lífið og tvö afabörn hans sem að voru með honum lifðu af.

Þetta var í hámæli þá og maður hefði eiginlega haldið að þá hefði verið gerð innköllun þar sem að þarna var um tiltölulega nýjan bíl að ræða á þessum tíma.

Ég man þetta mjög vel þar sem að annar aflifandinn var besti vinur bróður míns.

[Kiddi]

Banaslys, og ekkert gert í þessu... hvað er að í kerfinu???

[jongud]

Banaslys, og ekkert gert í þessu... hvað er að í kerfinu???

13 ár síðan, ýmislegt hefur breyst.
Rannsóknarnefnd umferðarslysa myndi taka á svona máli núna.

[Kiddi]

Banaslys, og ekkert gert í þessu... hvað er að í kerfinu???

13 ár síðan, ýmislegt hefur breyst.
Rannsóknarnefnd umferðarslysa myndi taka á svona máli núna.

Já það var ekki fyrr en uppúr 2005 sem þeir fóru að gera eitthvað yfir höfuð

[lecter]

Eg vil þakka fyrir þennan þráð sem er virkilega flott upp settur ,,,

ég færi i Ransóknar nefnd umferðarslysa þetta á bara heima þar ,,,, svo alvarlegt er þetta mál að stoppa þarf alla þessa bila ,,, og helling er af þessum bilum úti á landi það þarf að setja upp svona þráð sem heitir alvarlegir Gallar i jeppum menn geta þá flett upp sinum bil og lagað eða gert við ef hann er en án lagfæringar ,,

ég vann i noreigi að mynda bolta i krönum i skipum gaman væri að mynda þennan styrisenda sem er þarna en ó brotinn þetta er gert með sérstöku spray siðan er notað hultra grænt ljós og allar sprungur tæring kemur i ljos ,,,

takk fyrir svona þráð ,,, JEPPASPJALLIÐ ER AÐ VIRKA AKKURAT HÉR,,,,

[jongud]

Smá breytingar hafa orðið;
Þetta heitir núna-
Rannsóknarnefnd samgönguslysa

Ég sendi þeim stutt erindi um þessar umræður okkar.

[jongud]

Ég fékk svar um hæl;


Sæll Jón

Þakka þér fyrir þessa ábendingu. Við höfum farið yfir þau banaslys sem við höfum í okkar gögnum þar sem Galloper hefur komið við sögu. Þau eru tvö, annað á Garðskagavegi í janúar árið 2000, það er það slys sem getið er um í spjallþræðinum. Bifreiðin var skoðuð og samkvæmt þeirri skoðun var stýrisbúnaður í lagi. Orsök hins slyssins var heldur ekki rakinn til bilunar í stýrisbúnaði.

En þó svo að þetta hafi ekki komið upp í þessum tveimur slysum þá er það engu síður áhyggjuefni ef rétt reynist að galli sé í þessum armi. Neytendastofa hefur með þessi mál að gera, þ.e. að halda utan um innkallanir á m.a. bifreiðum en við munum punkta þetta hjá okkur og hafa augun opin fyrir þessum galla.

kv Sævar

[Hr.Cummins]

Þetta var á garðskagavegi, man sterklega að það var rætt um þennan "spindil sem tilheyrir stýrisvél"

Finnst þetta skrýtið..

[Hr.Cummins]

Eftir smá eftirgrennslan, þá biðst ég afsökunar... mig minnti vitlaust, það voru uppi "spekúleringar" með að þetta hefði verið tengt stýrisbúnaði og þá kom upp í umræðuna galli í Pajero og svo framvegis...

Augljóslega ekki hægt að muna allt rétt eftir 14ár, en ég man samt eftir að hafa séð myndir af þessum Pajero galla og það er ennþá furðulegt að ekki sé búið að kanna með þetta í Galloper þar sem að hann er Pajero ættaður...

[gislisveri]

Veit einhver hvort Galloper var innkallaður í öðrum löndum út af þessu?

[grimur]

Ég fann ekkert á netinu um innköllun a Galloper útaf þessu.
Mikiðnaf þessum bílum fóru til miðausturlanda þar sem innkallanir eru ýmist óframkvæmanlegar eða illa séðar. Jafnframt eru líklega ekki eins miklar tæringar aðstæður þar. Íslenskt veðurfar er sérlega tærandi, einkum þegar seltu er blandað í jöfnuna. Þetta brot byrjar einmitt sem tæring, sem þróast svo í svokallað "stress corrosion cracking", sem gæti kallast þreytusprungumyndun vegna tæringar á hinu ástkæra ylhýra.

Bretland er líklegast til að hafa skoðað þetta. Þar eru Galloperar, tæring og frekar dugmikil yfirvöld hvað svona lagað varðar. Ég fann afturámóti ekkert á netinu hjá þeim nema um Pajero.

Kv
G

[Aparass]

Fyndið...... og ekki fyndið.
En ég var að keyra á pæjunni minni yfir gatnamótin á kringlumýrarbraut og miklubraut og það er smá svona þvottabretti á þessum gatnamótum á leið til kópavogs og þá allt í einu fann ég að það hafði eitthvað skeð þegar hann titraði aðeins á gatnamótunum svo ég keyrði hann rólega yfir á hægri akreinina og beigði inn til hægri hjá suðurveri og inn á planið þar og beint í stæði.
Hoppaði út og kíkti undir bílinn að framan og þá lafði styrisstöngin og endinn út við hjól farinn í sundur nákvæmlega eins og á myndinni hjá þér.
Bjargaði því bara að spindilhallinn er réttur í þessum bílum svo ég gat keyrt áfram og beigt eins og ég vildi en ekki hægt að bakka án þess að hann beigði hjólið innundir sig.
Ég hefði þess vegna getað keyrt hann frá akureyri og í bæinn án þess að þetta truflaði aksturinn neitt.
Ég hef samt alltaf verið eitthvað smeikur við endana í bílnum mínum eftir þetta því ég var með konuna og börnin í bílnum þegar þetta gerðist.

[Sævar Örn]

Getur einhver útvegað þennan pitmann arm á ísl. annar en Hyundai umboðið?

Hekla vill ekki sjá hann...

nr bílsins er RD 900 og komið óhóflegt slit í spindil í pitman arm og einnig í spindil í stýrisupphengju

fann endann bæði hérna að ofan á eBay og líka hér http://www.fourgreen.com/store/scripts/ ... 372&cart=y

og upphengjuna hér http://www.fourgreen.com/store/scripts/ ... 407&cart=y

c.a. $150 með sendingu, svo bætist vsk og tollar við sennilega heim að dyrum í kringum 25.000 kall ekki satt?


kv. Sævar Örn

[grimur]

micksgarage.com eru skemmtilegir við að eiga.
Kannski hægt að fá sendinguna á skikkanlegu verði frá þeim, eða þá ef einhver í familiunni er að fara til UK þá er bara að láta senda á hótelið eins og ég gerði.
Stóð allt eins og stafur á bók og gúmmíbangsar í bónus með arminum !
http://www.micksgarage.com/search.aspx?fffDepartment=Steering%20Arms&fffMake=Hyundai&fffBasemodel=Hyundai%20Galloper&fffModelDescription=GALLOPER%20I%201991%20to%201998

Kostar aðeins meira en í USA, en sendingarkostnaður gæti verið heppilegri. Svo eru þetta prýðismenn sýnist mér.

kv
G